Assassornermik sulisartut tamatigoortut amigaataapput – ingammik suliffeqarfinni mikisuni
Qaqortumi sanasup suut tamaasa annikitsumik suliaqarfigisinnaassavai. Sanasulli naalagaannut Peter Geraaemut suliffeqarfiit mikisut pisariaqartitaannik siamasissumik misilittakkamik tassannga pilinnik suleqatinik nassaarniarneq ajornarnerulersimavoq.
2008-mi illoqarfimmi angerlarsimaffigisamini Nanortalimmi sanasutut suliffeqarfiutini Peter Geraaep aallartippaa. 2014-mi nuliani peqatigalugu Qaqortumut nuuppoq, tamaani ukiumi ataatsimi Permagreenimi sulilluni, taanna tassaavoq Kalaallit Nunaanni suliffeqarfiutillit, aamma sanaartornermik suliffiit annerpaartaasa aamma pisoqaanerpaat ilaat, tassalu 2015-ip naanerani nammineq suliffeqarfiutiminik aallartitaqarnini sioqqullugu – maannakkulli Qaqortumi.
Suliffeqarfimmi suliassanik sunilluunniit suliaqartarput – qalianik iluarsaassinernit kiffiusersuinernillu naqqumik sulianut aamma sanasutut sulianut. Taamaattumik Peter Geraaemi suleqataasuugaanni assigiinngitsorpassuarnik isumaginnissinnaasoqartariaqarpoq.
Nunatta silaa unammillerfiit pilersittagaannik tamakkuninnga peqaraluartoq Peter Geraaemi suleqataasut ataatsimut isigalugit sunik tamanik suli suliaqartarput.
– Sunik tamanik suliaqarpugut – aamma ukiuunerani. Soorunami silap pissusiata suliaqartitsisinnaanera apeqqutaasarpoq, ukiuuneranilu silami suliassat isumaginissaat nalinginnarmik pinngitsoorniartarpagut. Pisariaqassatilluguli suliarisarpavut, Peter Geraae oqarpoq.
Suliassat sanasunik tamatigoortumik isumaginnissinnaasunik pisariaqartitsigaangata tamanna aamma Peter Geraaep suliffeqarfianut unammillerfissat ilaannik tunisisarpoq.
Inunnik ilinniagaqarsimasunik amigaateqarneq unammillerfissanik pilersitsivoq
Peter Geraaep oqarneratuut suliffeqarfiutaanut unammillerfissani anginerpaat ilagaat sanasunik, allaallumi assassorlutik sulisartunik pikkoorissunik nassaarniarsarisarneq.
– Tamakku nassaarineqarsinnaajunnaalerput. Uagutsitut suliffeqarfinnut miikisunut, tamanik suliaqartartunut iluarsaasarnerup, suliassat annikitsut, aamma immikkut paasisimasalinnit suliassat iluini aamma suliaqarsinnaasunik sulisunik peqarusuppugut. Suliffeqarfinnit angisuuneersut, uangalu suliffeqarfiutinnut sulisarnissamik qinnuteqartut pitsaanerpaaffigisaasigut atorsinnaanngingajappagut, Peter Geraae oqarpoq, nangipporlu:
– Assersuutigalugit iluarsaassinernik annikitsunik aamma qaliap pappialarsuinik misigilittagaqannginnerat pissutaanngilaq. Suliffeqarfinni angisuuniissimasut immaqa nutaanik sanaartugaannangajannik, imaluunniit suliassanik angisuunik suliaqarsimasarput. Tamakkulu ataatsimut isigalugit illoqarfimmi maani ingerlatarineqanngillat.
Kalaallit Nunaanni ilinniagaqarneq sanasutut aamma pequtinik sanasartutut suliaqarnernik imaqartoq Peter Geraaep oqaluttuaraa, taamaattumillu ilinniakkamik naammassisaqaraanni ilinniartutut tamanik atuisinnaanissamut periarfissaqarpoq.
Nuummut naleqqiullugu inuiaqatigiit allaanerusut
Nuummut assersuussilluni Qaqortumi suliassat aamma suleriaatsit allaanerulluinnarneri Peter Geraaep oqaluttuarai.
– Nuummut naleqqiulluta inuiaqatigiit allaanerujussuuvugut. Nuummi suut tamarmik sukkasuupilussuarmik pisarput, amerlasoorpassuillu unissanatik sanaartugaapput. Isorliunerusuniittugut eqqissisimanerulaarluta inuuvugut, tamaanilu allanngoriartorneq sukkavallaartorsuunngilaq, Peter Geraae oqarpoq.
Taamaattorli Qaqortumut mittarfiliornermik suliniut takkuppoq, taassumalu illoqarfimmi allanngoriartorfimmik aallartitsisinnaanera Peter Geraaep taakkartuutigaa.
Taamaattorli Peter Geraaep suliffeqarfiutaa uninngangallarpoq. Sulisuni nutaamik suliffissarsioqqullugit oqarfigisimavai, paarlattuanillu saniatigut suliarisimasaminik suliamik allamik sammisaqarnialerpoq.
Peter Geraae angallammik peqarpoq, Targa 25.1-imik, inunnik arfinilinnik angallassisinnaasumik. Taanna atorlugu assersuutigalugu Uunartumut, puilasumik kissartoqarfilimmut, oqaluffiit illukortaannut, arfersiornernut, imaluunniit serminut iigartartunut angalanernut atuisartut aalajangersimasut, aammalu pisortani sullissisarfiit, takornariat, imaluunniit inuinnaat Peter Geraaep angallattarpai.
Nioqquteqarfimmik tassannga manna tikillugu sanasutut suliffeqarfiutimi saniatigut ukiuni pingasuni Peter Geraae ingerlataqarsimavoq, maannakkulli taassuma tamakkiisumik sammisarilernissaanut piffissanngorsimavoq.
– Suliffeqarfiutinni kisimiilaarnissara aalajangiussimavara. Sulisitsisuuneq qasunarilaalersimavara. Imaasinnaavorli piffissap arlaanni nammineq namminersortutut aallartitaqaqqissinnaasunga, Peter Geraae naggasiivoq.
Kalaallit Nunaanni allaaserisat allat atuakkit uani
