Sanaartornermi ajornartorsiutit oqaluuserineqarlutillu qaqilerneqartariaqartut Ove Hansenip tikkuarpaa.

Kalaallit Nunaata ilarujussuani sanaartortoqaqaaq. Kalaallini sanaartugassanik suliakkinneqartartut ilagaat Avannaani suliffeqarfik sanaartugassanik suliakkinneqartartoq, Aasiaat VVS ApS, sanaartugassap pilersaarusiorneraniit naammassinissaanut suliaqartartoq. Suliffeqarfik assigiinngitsorpassuarnik suliaqartarpoq soorlu VVS, kiassarneq oliefyrimillu kiffartuussineq, kuuffilerineq oqorsaanerlu, kiisalu sanasutut qalipaasutullu suliaqarnermit assartuinermut, aputaajaanermut, nunamik assaanermut ingerlatsissutinillu aserfallatsaaliinermut.

- Aasiaat VVS ApS-ip atiani VVS-ilerisartugut allassimagaluartoq suliassat ukiut ingerlaneranni ineriartorsimapput, taamaammallu suliniutit assigiinngiiaartorpassuit suliarisarlutigit, Ove Hansen, Aasiaat VVS ApS, oqaluttuarpoq. Suliffeqarfik ukiuni 50-ini ingerlasimasoq ukiuni 20-ni kingullerni ingerlassimavaa.

Aasiaat VVS ApS ullumikkut kalaallinik 40-ngajannik sulisoqarpoq suliassaqarluaraangallu kalaallit 70-80-it sulisorineqartarlutik. Kalaallinik sulisoqarnissamik salliutitsinissaq politikkikkut ukiuni kingullerni kissaatigineqarsimammat tamanna Aasiaat VVS ApS-imit piviusunngortinniarneqarsimavoq.

Kalaallit suliffeqarfiutaannik immikkoortitsineq

- Siornatigut qallunaarpassuarnik aamma sulisoqartarnikuuvugut. Kalaallinik taarsersornissaat ajornarsimanngilaq. Aamma 80-it tikillugit sulisoqartaraluarluta. Kalaallinik konstruktøreqarlunilu, innaallagialerisoqarlunilu ruujorilerisoqarnera nuanneqaaq. Ajornartorsiut akuttunngitsumik immikkoortinneqartarnitsinniippoq. Assersuutissaqqissut ilagaat utoqqaat illua sanagatsigu imaluunniit inissiarsualioratta. Sanaartornerni taakkunani amigaataasut allattortussaavavut sanaartortitsisumullu tunniullugit. Tamarmik taamaaliortussaapput. Amigaataasut iluarsinissaannut ullut 14-it piffissalerneqartarpugut ilisimatinneqarlutalu taamaaliunngikkutta suliassaq allamut tunniunneqassasoq, Ove Hansen oqarpoq, nangillunilu:

- Suliffeqarfiit allat pineqartillugit allatut periuseqartoqartarpoq. Assersuutigalugu inissiat nutarterneqareermata inuit isertertinneqarput amigaataasorpassuit iluarsaanneqanngitsulluunniit. Meeqqerivimmi assinganik pisoqarpoq. Amigaataasut allattorsimaffianniittut kingorna kommunip akiligaanik iluarsaanneqarput, aali sanaartornermi qularnaveeqqummut ilaagaluartut. Sanaartortitsisut sinnerlugit nakkutilliiartortoqarpoq sanaartortitsisullu sinnerlugit isumaqatigiissutigineqarpoq illuutip atulereernerani amigaataasut allattorsimaffianniittut ataavartumik suliarineqassasut. Nunaqavissut ullut 14-it qaangiutinnginneranni suliarereersimassavaat, Ove Hansen nassuiaavoq.

Ingutsinermit eqqugaasut

Kalaallit Nunaanni inuiaqatigiit mikisunnguanut aggulunneqarsimaneranit sunnerneqarsimapput taamaammallu inuit imminnut ilisarisimalluarlutik iluaqutaasumik ajoqutaasumillu. Ove Hansen sulisuilu inuiaqatigiinnguani najugaqarnermit sunniuteqarnerluttumik misigitinneqarsimapput.

- Ilungersunaqaaq kalaaliusugut mikinerusutut misigitinniarneqartarnerput, aali tunniuttakkavut pitsaanerusaraluartut. Utoqqaat illuat anngajaamik allineqarnera suliarigatsigu, Namminersorlutik Oqartussat aningaasaliissuteqarfigisaannik, tusarsimavaat ”sannarlutarujussuarmik” suliaqarsimasugut, taamaammallu nakkutilliiartortussamik aallartitsillutik.

- Nakkutilliiartortup amigaataasut allattorsimaffeqarnersoq misissorpaa atuisullu oqaloqatigalugit. Oqarpoq: ”Isumaga uniorluinnarpoq tusarsimavarami suliatit sussaanngitsut. Suliarisimasatilli kusanaqaat. Atuisulluunniit naammagittaalliutissaqanngillat aali ukiut marlunnguleraluartut.” Kingorna taamaattunik suliaqarsimatilluta isumagisartakkatsinnik kiassarnermut aaqqissuisimanerput misissorpaa. Oqarpoq: ”Nuummiluunniit ilissitulli pitsaatigisumik suliaqartoqarneq ajorpoq. Suliasi kusanaqaat taamaammallu pakatsissutigaara taamannak oqaluuserineqarsimagassi”, Ove Hansen misigisani pillugu oqaluttuarpoq.

Piumasaqaatit takkuteriasaartut

Aasiaat VVS ApS erngup aqqutaanik taakkuninnga suliaqarnermi piumasaqaatit atorlugit suliaqarmat, nutaanik qaavatigut piumasaqaateqaleriasaarnera Ove Hansenip misigaa.

- Tassanngaannaq qaammataasat atorlugit erngup aqqutaasa sanguneri ventilillu sumiinneri uuttortartussanngorpavut. Misilinnikuusimanngisaannarparput sinerissamilu suleqatigalugit sianerfigaavut. Allani taamaaliortoqarneq ajorpoq. Nakkutilliisoq oqaluupparput qaammataasamiilli uuttortaanerit ingerlatereerutsigit aatsaat akilerneqartussaasugut oqarluni.

Qaammataasamit uuttortaasinnaajumalluni Aasiaat VVS ApS atortussaminik inniminniisariaqarsimavoq taamaammallu suliassap naammassinissaanut piumasaqaat nutaajummat piffissaqarnerunissamik piumasaqarluni.

- Neqerooraluarput 25.000 kr.-lerlugu uuttortaatissinnaagivut. Qujaannarpugut. Piffissaqartinneqarnerunissarput piumasaqaatigiinnarparput atortussagut inniminnersinnaajumallugit. Piareeratta uuttortaanissamut nakkutilliisut peqataanissamut qaaqquagut. Namminneq misilittagaqannginnamik iluatsillugu qaammataasamit uuttortaanermut pikkorissartinneqarsinnaanerlutik aperipput. Uuttortaanerit ataatsimoorluta ingerlappavut. Allat taamannak uuttortaasussaatinneqanngillat. Ilungersunaqaaq. Ukiut kingulliit tallimat iluanni taamannak misigisaqartinneqartarpugut, Ove Hansen, sanaartornermik suliffeqarfinnik il.il. ataasiakkaanik taasaqarusunngitsoq oqaluttuarpoq. Oqaatigaali ajornartorsiutip ammasumik oqaluuserineqarlunilu qaqilerneqarnissaa pisariaqartoq.

- Sanaartornerit nutarsaanerillu ajornartorsiutigineqartut amerlaqaat. Taakku nunatsinni inuiaqatigiinnut akileraartartunullu akisoorujussuupput, Ove Hansen naggasiilluni oqarpoq.