Johansinnguaq Andreassen 37-nik ukioqartoq 2012-imi sanasutut ilinniakkaminik naammassivoq, suliffeqarfinnilu assigiinngitsuni 2015-ip tungaanut sulilluni, taamaalinerani ilinniaqqinnissaminik isumassarsisimalluni. Nulianilu Danmarkiliarput illuliornermi konstruktøritut ilinnialerniarluni, sukkasuumilli ilinniakkani Odensemi illuliornermi ataqatigiissaarisumut allanngortippaa.

- Ilikkagaqarnerunissaq pissanganartissimavara, kisianni ilinniarnerma affaa siulleq artornarsimavoq. Ilinniartitsinerit tamarmik qallunaatut ingerlanneqarput, assersuutigalugulu atuaqatinnut saqqummiussassannik suliaqarneq misilinnikuunngisaannarlugu. Qujanartumik nuliannit Kalaallillu Illuutaannit tapersersorneqarpunga inuunerilikkannilu ingerlallualipallallunga, oqaluttuarpoq.

KJ Greenland A/S-imi qaammatini pingasuni praktikkeriarluni kingorna atorfinitsinneqarami Johansinnguaq Andreassen Kalaallit Nunaannut utersinnaalerpoq ilisimalikkanilu atorsinnaalerlugit. Ullumikkut sanaartornermi suliniutinillu aqutsisuuvoq suliffeqarfimmilu sanaartukkanik ulluinnarni aqutsinermik suliassallu assigiinngitsut ataqatigiissarnerannik ilaatigut akisussaaffeqarluni pingaarutilimmik inissisimalluni.

- Sanasutut sulineq ilaannikkut maqaasisinnaasarpara, kisianni akisussaaffimmik tigusineq tamakkiisumillu isiginnilersisitsineq nuannarisorujussuuakka. Aamma kalaallisut qallunaatullu oqalussinnaanera isumaqartorujussuuvoq – sanaartorfinni attaveqaqatigiinneq oqinnerulerlunilu toqqaannarnerulerpoq, Johansinnguaq Andreassen oqaluttuarpoq.

Ilinniaqqinnermik ukkataqarneq

Sanaartugassanik suliakkinneqartartumi KJ Greenland A/S-imi, 2011-mi pilersinneqartumi Kalaallit Nunaannilu sumiiffiit akornanni 250-300 missaannik sulisoqartumi, oqaluttuat Johansinnguaq Andreassenitut ittut sanaartornerup siunissaanik aqqutissiuussisuupput.

- Sanaartukkanik suliakkinneqarnermik sanaartornermillu suliassaqarfimmi ilinniartut ilinniartinneqarnissaat ukiuni arlaqartuni siunnerfigalugu sulisimavugut. Inooqataanikkut suliatigullu iliuuseqarnissamik tamanna pisariaqartitsivoq - Kalaallit Nunaannimi ilinniagaqarniaraanni atuariartornermut atatillugu ilaquttat qimattariaqakkajuttarput. Taamaammat tapersersornissaat pingaartittarparput – suliatigut pikkorissaasarnikkut inooqataanikkullu sammisassaqartitsinikkut. Alloriarnissalli tullia aamma taamak pingaaruteqartigaaq: pilersaarusiornermik, ingerlatsinermik aqutsinermillu akisussaaffimmik tigusinerusinnaanissaat siunertaralugu inuusuttut ilinniarsimasut amerlanerusut ilinniaqqinnissaat, pisortaanerup tullia Mads H. Nørgaard nassuiaavoq.

Ilinniakkap qaavatigut ilinniaqqittarnermik ileqqoq Kalaallit Nunaanni suli atorneqartorujussuunngilaq. KJ Greenland A/S-imili inuusuttut ilisimasaasa suliassaqarfimmilu pimoorissinerisa sanarfeqqinnissaat pitsaasutut isigineqarpoq. Nunaqavissunik sanaartornermi aqutsisut kulturi pillugu oqaatsinillu piginnaasallit sanaartorfinni toqqissisimanermut ersarissumillu attaveqaqatigiinnermut iluaqutaasarput.

- Sanaartornermi aqutsisut assamminik sulisunik naligalugit oqaloqateqarsinnaanerat ataatsimullu oqaaserisatik atorlugit suliatigut paasinninnermik pilersitsisinnaanerat toqqissisimanermik tatiginninnermillu pilersitsisarput – sanaartorfimmilu suleqatigiinnermik nukittorsaasarpoq. Ilinniaqqinnikkut misissueqqissaarnissamut, pilersaarusiornissamut sanaartugassallu pitsaassusilimmik sukkassuseqarluni ingerlatsinissamut ilisimasaqarnerulerlutillu sakkussaqalertarput – piffissaq, pitsaassuseq silallu qanoq innerata eqqarsaatiginissaa ukkataralugit.Sulisut tassunga ingerlarusuttut tapersersorusuppavut, ilitsersuinermik aaqqissuussinikkut, attaveqarfiit atorlugit Danmarkimilu ilinniarfeqarfinnut attaveqarnikkut, pisortaanerup tullia Mads H. Nørgaard oqaluttuarpoq.

Kinguaariinnut tullernut maligassiuisoq

Johansinnguaq Andreassen KJ Greenlandimi aqutsisoqatigiinnut ilaavoq suliffeqarfimmilu ilinniartunut assamminillu sulisunut inuusuttunut maligassiuisuulluni. Taassuma oqaluttuaata takutippaa sulisumiit aqutsisunngornissamut aqqut takorluugaannaanani piviusumik anguneqarsinnaasoq.

- Ilinniaqqinniaraanni sapiissuseqartariaqarpoq. Ullulli tamaasa atuartaraanni ilinniartitsinermullu peqataagaanni alapernaassuseqaraannilu naammassineqarsinnaalluarpoq                   . Amerlanerusut assinganik alloriarumaartut neriuppunga, oqarpoq.