Bay Christensen A/S-ip Atlantikup avannaani niuernini inerisarniarpaa
Maskiinanik pilersuisoq Bay Christensen A/S maskiinanik Savalimmiuni sanaartornermut ukiuni qulikkaani tuniniaasarsimavoq. Sanaartornermi atortunik atoqqiineq Danmarkimi niuernermi nutaajuvoq, tamatumalu Atlantikup avannaanut siaruaannissaa ingerlatseqatigiiffimmit kissaatigineqarpoq, eqqortumilli sukkassusilimmik pissalluni.
Bay Christensen sanaartornermi 2024-mi ukiunik 40-nngortorsiorpoq. Ilaatigut assaassuteeqqanik Takeuchimik meqqilinnik sanaartugassanik suliassinneqartartunut naatsiivilerisunullu tamakkiisumik pilersuisutut nioqquteqartartutullu maskiinanik suliffeqarfik Sjællandip kujataani Rønnedemeersoq ukiut ingerlaneranni Danmarkimiinnanngitsoq, kisiannili aamma Atlantikup avannaani, pingaartumillu Savalimmiuni sullitarpassuaqalersimavoq.
- Savalimmiut ukiuni 30-ni niuerfigisimavarput. Maskiinarpassuarnik tassani tunisaqartarsimavugut kiisalu sannavinnik biiliutilinnillu suleqateqarluarluta, Bay Christensenimi maskiinanik tuniniaasoq, Morten Christoffersen, suliffeqarfiup piunerata ilarujussuani ilaasimasoq oqarpoq.
Savalimmiuni niuerfik nalaatsornikkut pisimavoq Atlantikullu avannaani niuerfeqarnissamik periusissiaqarnissaq ilaasimanani. Ukiulli ingerlaneranni Savalimmiuni ingerlataqarneq annertusiartorsimavoq, soorlu aamma Bay Christensen A/S-imi allarpassuit taamannak ingerlasimasut. Alliartupiloornerminngarnit suleqatigisanit tatigineqarnissaq siunertaralugu sullissilluarneq, sullitat naammagisimaartut eqqarsaatigilluakkamillu sukkassusilimmik suliassat ingerlanneqartarnissaannik aallaaveqarneq pingaarnerujussuupput, Morten Christoffersen naqissusiivoq.
- Niuernitsinnik annertusaagutta aallartitatsinnik malinnaasinnaassaagut qulakkeerisinnaassallutalu. Ingerlasinnaanngitsunik taamalu eqqartornerlunneqartussanik Savalimmiunut imaluunniit Atlantikup avannaanut nassiussisinnaanngilagut. Thorshavnimi sullitagut Danmarkimisulli pitsaasumik misigisaqassapput.
Immikkoortorpassuit ulapititsisut
Savalimmiuni sullitat ilaat, sanaartugassanik suliakkinneqartartoq MT Højgaard qeqertani niuernerminik ukiup aallartinnerani matusisariaqarsimagaluartoq, tamanna Bay Christensen A/S-imut sunniuteqarujussuarsimanngilaq. Maskiinanik suliffeqarfik Danmarkimi 50-it missaannik sulisoqartoq Atlantikup avannaani ingerlataqaannassaaq immikkoortortanilu arlaqartuni suliaqarluni, tamannalu nukissaqartitsilluartoq, Morten Christoffersen nassuiaavoq.
- Fjernvarme, biilinut innaallagiatortunut innaallagissanut atortulersuutit, sialoqarnerulernera pissutigalugu bassinit illoqarfinnik paqqersaatit, naatsiiviit, nalinginnaasunik inissianik sanaartorneq – tamarmik assaassuteeqqanik pisariaqartitsipput. Sanaartugassanik suliakkinneqartartunik suliaqarfinni suliaqarfinnut aalajangersimasunut pituttorsimanngilagut. Sanaartugassani ilaanni unikaallattarneq iluamik malugineq ajorparput. Ulapittorujussuuvugut, Morten Christoffersen oqarpoq, oqarlunilu ulluinnarni piffissaasuaneq pissutigalugu Atlantikup avannaani suleqatissanik pitsaasunik niuerfimmi ujaasiniarneq ajornakusoorsinnaasartoq.
Nunalerinermit suliffissuaqarnermut atoqqiinermullu
Bay Christensen 1984-imi pilersinneqarmat pingaarnertut niuerutigineqartoq ataasiinnaaneruvoq. Tunngaviliisoq C. Bay Christensen Sjællandimi narsaatinut nunalerinermi maskiinanik atornikunik tuniniaasarpoq. Danmarkilli atugartuunngoriartornera nunalerinermilu suliffissaqartitsinerup apparnera ilutigalugu, nunalerinermi sullitat ikiliartulerput suliffissuarnilu sullitat amerlillutik.
Assaassuteeraq Japanimeersoq Takeuchi 2002-mi nioqqutissat akornanniilerpoq suliassaqarfimmillu tamatuminnga ukkataqarneq suliffeqarfimmi 2017-imi kinguaariit nikinneranni atasussanngortivinneqarluni. Nunalerinerup pingaarnertut suliassaqarfiunera qanganngorpoq. Niuernermi atoqqiinermik aqqut nutaaq ukiut sisamat kingulliit pilersinneqarsimavoq.
- Aatsitassanik, sanaartornermi eqqagassanik, issunik immikkoortiterisarpugut kiisalu ujaqqanik betonillu sequtserisarluta. Atoqqiinermik sulialinnik ikkussuisunik marlussunnik tuniniaasumillu sulisoqarpugut, Morten Christoffersen oqarpoq oqaluttuarlunilu sanaartornermi atortunik atoqqiinerup iluani malunnaatilimmik ataqqineqarlunilu ingerlataqalernissaq Bay Christensen A/S-imit kissaatigineqartoq – Danmarkimut Atlantikullu avannaanut atatillugu.
- Savalimmiuni, Kalaallit Nunaanni Islandimilu atoqqiinermut atatillugu suliaqarnerulerusuppugut. Tamannali ataqatigiilluartumik pissaaq sukkassusaalu uatsinnut sullitatsinnullu naapertuulluni. Angumerisinnaanngisatsinnik suliassarpassuaqassanngilagut.
