Anette Grønkjær Lingsip Bo Lingsillu Sisimiuni akunnittarfiliornertik naammassiliivippaat. Sulinngiffeqarnermi inissiat 13-it pisiniarfillu aasaru tikeraartunut piareersimassapput.
Akunnittarfiliorneq sanaartornermi nutaanik aqqutissiorpoq takornariaqarnerulersitsisinnaallunilu
Aallarnisaasut – Grønlandsbankenimit tapersersorneqarlutik – Sisimiuni akunnittarfiutimik aappassaannik ammaangajalerput. Sanaartorneq issittumi sanaartoriaatsimik nutaamik takutitsivoq, Kalaallit Nunaannilu illoqarfiit anginersaasa aappaani takornariaqarnerulersitseqataasinnaalluni.
Grønlandsbankip suliniutinut Kalaallit Nunaanni tamarmi ineriartornermik takornariaqarnermillu siuarsaasunut Vækst Kapitalimut taarsigassarsinissamut 100 mio. kr.-it immikkoortissimavai, Jesper Overgaard Sørensen, Grønlandsbankimi pigisanut aningaasaliinermut pisortaq, oqarpoq.
Sisimiut ukioq naallugu qimussernermik, pitsassuarmik pinngortitaliarnermik qamuteralammillu angalanermik, heliskiingimik, ilitsersuisoqarluni pisuttuarnermik, aalisarnermik, kangerlummi imaanilu umiatsiarnermik minnerunngitsumillu nunani tamalaani ujakkaarnermik aaqqissuussinermik Arctic Circle Race-mik immikkuullarissunik misigisassaqarfiunertik ilisimaneqaatigaat.
Takornariaqarneq illoqarfimmut pingaaruteqarnerujartorpoq ineriartornermillu ikorfartuisussamik aasamut alloriartoqassalluni. Akunnittarfik nutaaq ujartorneqartorujussuarnik akunnittarfimmi inissiaqartussaq takornarianut tikeraanullu allanut ammarneqassaaq. Ammaasuupput aappariit Anette Grønkjær Lings aamma Bo Lings, Hotel Sisimiut-nik ingerlatsereersut.
Grønlandsbanken aningaasaqarnermik siunnersuisoralugu 2023-mi inaarutaasumik aalajangerput nunaminertami ukiualuit matuma siorna pissarsiarisimasaminni illuutiminnilu siullermi nutarsarneqarsimasumi ikuallatsinneqarnermilu kingorna ajoqusivissimasumi sumik sanaartussanerlutik.
- Nalinginnaasumik sanaartornissamik siullermik pilersaaruteqarpugut, kisianni kvadratmeterimut akisuallaassasoq paasivarput. Taamaammat sanaatoriaatsit atortullu allat misissorlugit aallartipparput, Bo Lings oqaluttuarpoq.
Sanaartortitsisut aaqqissuussaanikkut aamma nutaanik aqqutissarsiorput, tassami najukkami assassornermik ilinniagallit naalagaannik mikinernik fagentrepricenik ikittunnguanik akullugit atuerusussimapput sanaartornermillu namminneq aqutsillutik pitsaassutsimillu qulakkeerinnillutik.
- Ataatsimut isigalugu suliniut najukkami suliffeqarfinnut mikinernut angivallaarpoq, taamaaliornikkulli taakkununnga tapersersueqataasinnaavugut, suliniummullu pitsaasumut peqataasimanermut tulluusimaarnerujussuaq misigaara, Bo Lings oqarpoq.
Kalaallit Nunaanni ineriartornermut 100 mio. kr.-it
Grønlandsbankimut Sisimiuni akunnittarfimmik suliniut Kalaallit Nunaat tamakkerlugu – aamma nutaanik mittarfeqalersimasuni illoqarfinni kisimi pinnani – ineriartortitsinermik takornariaqarnermillu aningaaseriviup qanoq ililluni tapersersuisinnaaneranut assersuutaavoq.
- Misilittakkavut sanaartortunut atugassanngortikkusuppavut qanimullu siunnersuinikkut, sanaartornermi akiligassarsititsinikkut, ataavartumik siunersioqatigiinnikkut kingornalu aningaasaliinissamik neqerooruteqarnikkut suleqateqarusulluta, Jesper Overgaard Sørensen, Grønlandsbankimi pigisanut aningaasaliinermut pisortaq oqarpoq.
Takornariaqarnermut immikkut pitsaalluinnartunik atugassaqartitsilluni Vækst Kapitalimut taarsigassarsisinnaanissamut naatsorsuutini kingullerni 100 mio. kr.-it immikkoortinneqarsimasut oqaluttuarpoq. Sanaartortitsisut suliniutertik pillugu oqaloqatiginninnissaannut tikilluaqqusivoq.
Bo Lings Grønlandsbankimik suleqateqarneq pillugu pitsaasuinnarmik oqaasissaqarpoq:
- Aningaaserivimmi suleqatigiinneq, siunnersuineq ataavartumillu oqaloqatigiinneq naammagisimaartorujussuuarput. Suliniuterput missingersuusiagullu pikkorissunit tigulluarneqarput, Bo Lings oqarpoq.
- Sisimiut illoqarfiuvoq isumassarsiorfiusoq, pingaartumillu aasaanerani ulapinnerpaaffimmi unnuiffissat amerlanerusut pisariaqartinneqarput. Piginneqatigiiffimmik immikkoortortalimmik Grønkjær Lingsimik suleqateqarluarpugut, Jesper Overgaard Sørensen oqarpoq.
Tunngavissioriaaseq aqqutissiuisoq
Takornariat inuussutissarsiuteqartullu inissianut iserterpata, akunnittarfimmiissapput ileqquusumik betonimik tunngaveqarani sisannik sukarsuarnik tunngavilerneqarsimasumik.
- Nunaminertami qaqqamut tunngavissamut 10 meteriuvoq, nalinginnaasumillu tunngavissiortoqassappat annertoorujussuarmik assattoqartariaqassaaq betonilu annertoorujussuaq atorneqarluni, Bo Lings oqaluttuarpoq.
- Norgemi pisaaseq qaqqani nunatalinni qeriuaannartumilu sanaartornermi ukiut qulikkaat arlallit atorneqarsimasoq taamaammat eqqupparput.
- Sisammik sukarsuit cortenstålimik qalligaapput, plastisk betonimik immerneqarsimallutik qaqqamilu tunngavissamut meterit marluk aalajangersimaqqissaartumik sammivilerlugit qillerneqarsimallutik. Sukarsuit qangatasumik qallerneqarsimapput marloriaammik ussissarneqarsimasumik, Bo Lings oqarpoq.
Sanaartornermi tamarmi uumassuseqanngitsunik atuisoqarpoq, taamaalilluni isugutammut, oqummut ikuallannissamullu aarlerinartoqarani. Ilaatigut illup saqqaatut atorneqartut nillertumik aqqutinik suujunnaarsitsisarput ussittorujussuunissaanillu qulakkeerinnillutik.
Akunnittarfimmiittunit kiammik nammineq atueqqissinnaasumik qitiusumi silaannarissaavimmit silaannaap pitsaassusaa aamma nuannaarutigisinnaassavaat.
Akunnittarfik aamma nukimmik atuilluarsinnaanera annertoorujussuuvoq. U-mik nalinga 0,11-uvoq, tamatumalu mineraluldimik kiffiutissat nalinginnaasut 500 mm assigalugit.
Allatut oqaatigalugu qimusserluni, ujakkaarluni aalisariarluniluunniit misigisaqareerluni nissut kivillugit kissartumik kakaoisorluni eqqissisimaarfissatsialak.
