Aatsitassalerinermik Ilinniarfimmi ukiumut ilinnialersartut 10-12-it inuussutissarsiutinilu ilinnialersut 20-it missaat marloriaataannik inissaqartitsisoqarpoq.
Aatsitassalerinermik Ilinniarfiup ilinniartuutai marloriaatinngorsinnaapput
Aatsitassalerinermik Ilinniarfimmit piginnaasat sanaartornermi aatsitassarsiornermilu ujartorneqarput, ikippallaalli qinnuteqartarlutik, taamaammat ilinniarfimmi pisortap amerlanerusut ilinnialersikkumallugit pitsaanerusumik nittarsaassiniarpoq.
Aatsitassalerinermik Ilinniarfimmi ilinniartitaanermik pisortaq, Hans Hinrichsen, sulisut nunatsinneersut saniatigut nunanit tamalaaneersut siuttuuffigai Canadamit, Spaniamit Danmarkimiillu suliartorsimasut. Aatsitassarsiornermi sulisunut assingupput.
Kalaallit Nunaat sanaartornerup aatsitassarsiornerullu iluani ineriartuleruttorpoq. Suliassaqarfinni taakkunani marlunni maskiinanik ingerlatsisut, qaartiterinermut aqutsisut piginnaasarpassuillu allat pissanganartut pisariaqartinneqarput. Aatsitassalerinermik Ilinniarfik piginnaasanut suliassaqarfinni taakkunani marlunni pisariaqartinneqartunut naleqqussagaavoq. Kisianni ilinniartitaanermik pisortaq Hans Hinrichsen ilinniartunik amigaateqarpoq.
- Ilinniartuutivut aatsaat taamak pisariaqartinneqartigilerput. Assersuutigalugu mittarfissialiornerit suliffippassuarnik pilersitsipput aatsitassarsiornerillu assinginik piginnaanilinnik sulisussarsiorput, Hans Hinrichsen oqaluttuarpoq.
Ilinniartunut praktikkerfissarsinissaq ajornanngeqaaq ilinniarnermillu naammassisut amerlasuut praktikkerfimminni suliffittaartarlutik. Ajornartorsiutaavorli Aatsitassalerinermut Ilinniarfimmut qinnuteqartut naammanngerujussuarmata.
- Qaangerniagassatta annersaraat amerlanerujussuarnik ilinniartuuteqarsinnaagatta. Ilami marloriaataanik ilinniartuuteqarsinnaavugut praktikkerfissarsinissarlu ajornanngitsunnguulluni. Inuit internetsikkut attaveqaqatigiittarfiini ilinniarfik pillugu nittarsaassillaqqinnerulertariaqarpugut, qaangerniagassattami annersaraat inuusuttut pikkorinnerpaat ingerlaannaq ilinniarnertuunngorniarfinnut innersuunneqartarmata.
Hans Hinrichsen taamaammat isumaqarpoq meeqqat atuarfiini aqqutissiuussisunut iliuuseqartariaqassajunnarsillutik. Aatsitassalerinermik Ilinniarfik pillugu aqqutissiuussisunut paasissutissiilluarnerunikkut neriuutigaa inuusuttut Aatsitassalerinermik Ilinniarfimmi ilinniagaqarnissamut kingornalu sulinissamut periarfissat pissanganartut pillugit paasisaqarnerusinnaassasut.
- Inuusuttorpassuit ilinniarnertuunngorniarfinni aallartittarput sinnerilu paggattarlutigit. Annertunerusumik paasissutissiisariaqarpugut sulinissamut, praktikkerfissanut suliffissanullu periarfissarpassuit pillugit oqaluttuartumik. Aatsitassarsiorfiit piginnaasalinnik Kalaallit Nunaanneersunik soqutiginnittorujussuupput nunaqavissunik atorfinitsitsineq akikinnerummat, Hans Hinrichsen oqarpoq.
Kujataani kuultisiorfiup Nalunap ammaqqinneqarnissaanut Naalakkersuisut akuersinissaat maanna utaqqineqarpoq, taamaalillunilu aatsitassarsiorfinni atorluaasuni marluusut aapparilissallugu. Siunissamili aatsitassarsiornerit Aatsitassalerinermik Ilinniarfiup piginnaasanik tunioraavigisinnaasaat amerlanerulernissaat naatsorsuutigineqarpoq.
Nunani tamalaani suliffeqarfik
Ilinniartitaanermik pisortaq Kujataani kuultisiorfimmut Nalunamut tikeraaqqammersoq apersorneqarpoq. Tassani ilinniartuutigisimasarpassuani nunani tamalaani suliffeqarfimmi atugarissaartut naapissimavai.
- Ilinniartuutiginikorpassuagut pikkorissartittarsimasarpassuagullu sulisut naapillugit nuanneqaaq.
Nalunaq nunani tamalaani suliffeqarferujussuuvoq tassani sulillutik amerikamiut, tyskit, serberit, Canadamiut allarpassuillu. Sulinermilu tuluttut oqaaseqartoqarpoq.
- Tuluttut oqaatsini suliatigut teknikkikkullu oqaaserpassuit atorneqarput aatsitassarsiorfimmi suliniaraanni tamanit ilinniarneqarsimasariaqartunik. Taamaammat meeqqat atuarfinni tuluttoorsimaneq naammanngilaq. C-mi inissisimasumik tuluttut ilinniartinneqarsimanissaq pisariaqarpoq. Kisianni inuusuttut tuluttut pikkorissigaluttuinnarput spileraangamik filminillu isiginnaaraangamik ilikkagarpassuaqartaramik, Hans Hinrichsen oqarpoq.
Hans Hinrichsenip qularutiginngilluinnarpaa siunissami aatsitassarsiornerit amerlanerusut aallartinneqarumaartut ilinniarsimasullu amerlanerusut pisariaqartinneqassallutik.
- Mittarfiliortiternerit naammassisussaapput. Sanaartugassaq angisooq tullinnguuttoq tassaavoq Nuup eqqaani Kangerluarsunnguani imermik nukissiorfiup allineqarnissaa. Ilinniartuutigisimasarpassuatta piginnaasaat naammapput. Tamatuma saniatigut aatsitassarsiornerit amerliartussapput piviusunngornissaallu upperaara. Imaappoq ilinniartuutitsinnut suliffissat suli amerlanerusut takkukkumaartut.
Kalaallit Nunaanni aatsitassarsiornerit pinngortitami ungasissumiittarput amerlasuutigullu qaqqarsuarni pinneqisuniittarlutik, soorlu assimi uani Kujataani Nalunami kuultisiorfimmeersumi. Aatsitassarsiorfiit atorluaasut misissuinerillu tamarmik nunaqavissunut nunanilu tamalaani suliffissaqartitsipput.
Aatsitassalerinermik Ilinniarfik
Aatsitassalerinermik Ilinniarfimmi ilinniartut sanaartornermi maskiinanik ingerlatsisutut aamma qaarusummi sulisutut ilinniarsinnaapput ilaatigut makkuninnga imaqartumik:
· Sanaartornermi maskiinat assigiinngitsut atornissaannut aserfallatsaalinissaannullu ilisimasaqarneq
· Kalaallit Nunaanni sanaartornermi pissutsinik ilinniarneq
· Sanaartornermi teknikkip iluani soorlu sanaartorfigiuminarsaaneq, aqqusinniorneq aamma tulattarfiliorneq/sapusiorneq pillugu atuagarsorneq aamma misilittaaneq
· Piiaaffinni nutaani misissueqqissaarneq
· Qaarsumi qillerineq aamma qaarsumik qaartiterineq
· Kalaallit Nunaanni saffiugassanik misissugassanik tigusinermi periaatsit
· Aatsitassarsiorfinni ammasuni sanaartornermi maskiinanik atuineq
Ilinniarniaraanni meeqqat atuarfianni matematikkimi, tuluttut qallunaatullu soraarummeersimanissaq piumasaqaataavoq.
Tamatuma saniatigut ilinniarfimmi pikkorissaanerit assigiinngitsut neqeroorutigineqarput, soorlu maskiinanik ingerlatsineq, qillerineq (borevogn), qaartiterineq, qillerineq (kerneboring), Rigging & Lifting aamma ikiueqqaarneq, ukiumullu 100-t missaannik pikkorissartoqartarluni.
