Jens’ Malerforretning ApS 1995-imi pilersinneqarpoq ukiunilu qulikkaani pingasuni kingullerni Kalaallit Nunaanni sanaartornerup ineriartornerani peqataasimalluni. Ilulissani qalipaasutut suliffeqarfik Jens Bro-mit aallartinneqarpoq ullumilu erneranit Niels Erik Bro-mit aallaqqaataaniilli ilaasimasumit ingerlanneqarluni. Ukiuni siullerni suliassat mikinerusimapput, soorlu najukkami allaffiit, inissiat ulluuneranilu paaqqinnittarfiit – angorusutalli alliartupallalersimapput.

– Piffissap ingerlanerani suliatigut pisinnaasagut sumilu suliaqarnigut annertusiartorsimapput. Kujataani Nuummiit avannaani Qaanaamut suliaqarsimavugut, Niels Erik Bro oqaluttuarpoq.

Inissiarsuarniit Kangiata Illorsuanut

Suliffeqarfiup suliarisinnaasai siammasipput. Suliassat angisuut siulliit takkupput Ilulissani inissiarsuit qernertut nutarterneqarmata, 2010-milu Nuummut siullerpaamik suliartorput, tassani Dronning Ingridip napparsimmavissuani pinasuartunut immikkoortortaq nutaaq napparsimasunullu  akunnittarfik qalipanneqarmata.

Taamanili Jens’ Malerforretning Ilulissani erngup nukinganik nukissiorfimmi, Uummannami atuartut ineqarfianni Ilimanamilu illuni eqqissisimatitani suliaqartarsimavoq. Ilulissani Kangiata Illorsua suliani immikkuullarissuuvoq, suliffeqarfik KJ Greenlandip ataani suliakkinneqarsimalluni illorsuup iluani silataanilu qalipaanermut kiisalu natermik sioralitserinermut uuliamillu taniinermut..

– Sanaartukkani kulturikkut illussanillu titartaanikkut pingaarutilinnik sanaartornermut peqataaneq pissanganartuaannarpoq, Niels Erik Bro oqarpoq.

Piginnaasat atortullu ukiut ingerlaneranni amerlisut

Jens’ Malerforretning-ip suliani ukiuni pingasuni kingullerni amerlisimavai maannalu sanasunik qarmaasunillu aamma sulisoqarluni, suliniutillu suunera apeqqutaatillugu fagentreprenøritut imaluunniit sanaartugassanik suliakkinneqartuni pingaarnertut suliaqartalernikuulluni.

Suliffeqarfiup atortuutini nutartertuartarpai namminerlu majuartaatinik, stilladsinik, naternik sioralitserussutinik seqqartaatinillu peqarluni – suliassat pisariusut nammineq sunniutilimmillu taamaalilluni suliarisinnaallugit. Sulisut ullumikkut arfineq pingasut missaanniipput, taakkununnga ilaallutik qarmaasit marluk sanasorlu ataaseq, tamannalu suliniutini mikisuni angisuunilu eqaatsumik suliaqartitsisinnaalluni.

Jens’ Malerforretning Utoqqaat illuannut Unganartumut 30.000 kr.-nik

 

Illorsuup oqaluttuassartaa ataqqillugu nutarterineq

Suliassani nutarterinissamik suliniutit pingaarutilinnut ilaapput – inissiarsuit kiisalu illut pisoqqat eriagisassat – oqaluffiit illullu qisummik sanaat oqaluttuarisaanermut pingaarutillit. Qanga atorneqartarsimasunik, soorlu linoliumimik qalipaatinik qisummiillu usserusiamik atuinermik immikkut piginnaasaqalersimapput.

– Illuutit aallaaviatigut isikkuisa attannissaat pingaarteqaarput. Ilisimasaqarnissamik, naammagittarsinnaanermik kiisalu sanaartortitsisumik siunnersuisunillu suleqateqarluarnissamik tamanna piumasaqaatitaqarpoq, Niels Erik Bro oqaluttuarpoq.

Massakkut suliarineqartut

Nutarterinissamik maanna suliarineqartut ilagaat Ilulissat inissiarsuit sisamat sisammik qaliallit, aamma Zionip oqaluffiata silataanik nutarteripput, tassani oqaluffiup napasuliaa saavatalu suliarinissaa immikkut ukkatarineqarlutik.

Suliffeqarfik nuna tamakkerlugu suli suliaqartarpoq, Niels Erik Bro-llu oqarnera malillugu ”suliat pitsaasuunissaannik pingaartitsineq erseqqarissunillu isumaqatigiissuteqarneq” ingerlalluarnermut qitiupput – qanorluunniit inissianik, suliffeqarfinnik imaluunniit kulturikkut kingornussassanik suliaqaraanni.