KJ Greenland ilinniarfitsialaarusuppoq

- KJ Greenlandimi suliffiga nuannareqaara ilinniarninnillu naammassiguma atorfininnissara anguniarlugu, sanasunngorniaq Nicas Clasen oqarpoq.

Kalaallit Nunaanni ilinniarfitsialaanissamut assigiinngitsunik piumasaqaatitaqarpoq, tamannalu Kalaallit Nunaanni sanaartugassanik suliakkinneqartartumit angisuumit KJ Greenlandimit naammassiniarneqarpoq.

- Ilinniartuutigut sanarfisarpavut, KJ Greenlandimi ilinniartunut akisussaasoq Jakob Forsingdal oqarpoq.

- Imannak paasillugu, ilinniartuuneranni isumagisarpavut, piumasaqarfigisarpavut attaveqarfigisarlugillu. Atuariartorneranni attaveqarneq immikkut pingaaruteqarpoq. Angerlarsimaffigisamiimmi ungasissumiinneq ilungersunarsinnaasarpoq inuusuttorpassuillu tamanna misilissimanngilaat.

KJ Greenlandimi taamaammat attaveqaateqarpoq ilinniartunut sianertartumik Sisimiunilu ilinniarfiannut tikeraartartumik.

- Ilinniagaqarnissamik toqqarsimasaminnik naammassinninnissaannut pitsaanerpaamik atugaqarnissaat sapinngisamik qulakkeerniarlugu ilinniartuutivut tapersersorniartarpavut. Tassunga atatillugu suliffeqarfiup atuarfiullu akornanni pitsaasumik attaveqaqatigiinnissaq aamma pingaaruteqarpoq. Ilinniartitsisut aamma nakkaannassanngillat inuusuttummi ilinniartuuneranni tamatta tunniussaqartaqaagut, taamaammallu soorunami ilinniartuutitta iluatsitsinissaat kissaatigisorujussuusarlutigu, Jakob Forsingdal oqarpoq.

KJ Greenlandimi ilinniartuusimasut tallimat akornanni sisamat ilinniarnerminnik naammassinnimmata suliffeqarfimmi atorfinissimasut oqaluttuarpoq.

- Uatsinnut ilinniartunullu atorfininnissamut pingaarutilimmik pitsaasumillu aqqutaavoq.

Ilinniartut amerlanersaat sanasunngorniarput. Ilutigitillugu KJ Greenland maskinmekanikerinngornianik, maskiinanik ingerlatsisunngornianik kiisalu Arktisk bygningshåndværkerinngornianik ilinniartuuteqarpoq. Suliassaqarfinni amerlanerusuni ilinniartuuteqalernissaq KJ Greenlandimit kissaatigineqarpoq, qarmaasut qalipaasullu massakkut soqutiginaateqarlutik.

Ilinniartuuteqarneq KJ Greenlandimut qanoq isumaqarpa?

- Ilinniartut assassornermik ilinniagaqarnissaannut sinaakkusiisinnaanermut nuannaarutigalugulu tulluusimaarutigaarput. Inuiaqatigiit ineriartornerannut suliffeqarfiup peqataanissaanut pissusissamisoortumik periusaavoq, Mads H. Nørgaard, KJ Greenlandimi pisortap tullia oqarpoq.

- Ilinniarfissatut kajuminnartuunissarput sulissutigaarput.

Nicas (erniusoq ilinniartorlu) aamma Jan Clasen (ataataasoq sanasutullu ilinniagalik).

Sanasut kinguaariit pingasut

KJ Greenlandimi sanasunngorniat ilagaat Nicas Clasen.

Suliaqarfimmi inunngorsimaannarpoq tassami aataava aamma sanasuusimavoq angutaalu, Jan Clasen, KJ Greenlandimi sanasutut aamma sulilluni.

- Nukappiaraatitut aallartippunga meeqqallu atuarfiata kingorna ilinniarfissannik neqeroorfigineqarlunga, Nicas Clasen oqaluttuarpoq.

Nicas inissaminut eqqortumut pisimasoq qularutissaanngilaq.

- Nuannareqaara ilinniakkannillu naammassiguma atorfininnissara anguniarpara.

KJ Greenlandip ilinniartuutiminut angalatitsisarneranut Nicas aamma peqataasimavoq.

- Angalanerit misigisarpassuaqartitsipput sulinermillu nuannaarnerulersitseqataallutik, Nicas sanasutut aasaru naammassisussaq oqarpoq.

Jakob Forsingdal oqaluttuarpoq angalanerit ilinniarnermut aalajangersimasumik ilaasut.

- Iluliarsuarnut qaannamik angalaarpugut qamuteralallutalu illuaqqamukarluta.

- Ilinniartuutivut arfineq marluk ilagalugit aamma Danmarkiliarnikuuvugut, tassani ilaatigut Hadstenimi Den Jyske Håndværkerskole, qisunnik pilattuisarfik, igaffinnik tunisassiorfik qisuerniarfillu takusarlutigit. Tamani tigulluarneqarpugut. Ornitatta ilaat ataaseq gummibådimik aquuteralalerlugu angalaartitsivoq – tamannalu ilinniartunut Kalaallit Nunaanneersunut alutorsartitsisinnaanngilaq, Jakob Forsingdal qungujulluni oqarpoq.

Ilinniartut Aalborgimi timigissartarfik aamma alakkarpaat, tappavaniinnerminnimi timimikkut pisinnaasalussiumasimanngillat!

Naleqartitat pitsaasut tunngavigalugit suliffeqarfik

KJ Greenland Kalaallit Nunaanni sanaartornermik suliniuterpassuarnut angisuunut akuuvoq, ukiullu 30-t matuma siorna Karl aamma Jens Jensenimit pilersinneqarmalli suliassat sulisullu amerlassusaannut piffissaq eqqorlugu pitsaassuseq isumaqatigiissutigineqartoq tunngaviusimavoq.

- Suleqatigiinneq, isumannaallisaaneq pitsaassuserlu ukkatarisorujussuuagut. Sanaartorfinni suliassaqarfiit akornanni suleqatigiinneq aaqqissuuttarparput periusitsinnilu piffissaagallartillugu peqqissaarneq atugaralugulu sungiusartarparput, Mads H. Nørgaard oqarpoq.

KJ Greenlandip ullumi 300-nik sulisoqarpoq ukiumullu 400 mio. kr.-it missaat kaaviiaartinneqarlutik. Suliffeqarfik akit tusaamaneqarluarneq kiisalu pissutsini ilungersunarsinnaasuni sanaartornermik ilisimasaqarluarneq tunngavigalugit suliassat amerlasuut pissarsiarisarpai.