17 meterinik itissusilimmik toqqaviliinerup Hotel SØMA suli ataatsimik initalerpaa

Hotel SØMA Sisimiut allineraniipput illumut ilassut nutaanik initalik, ataatsimeersuarnermut atortorissaarutit, isaariani pingaarneq nutaaq, ataatsimoorfissatullu inissat, tamaani nutaat sumiiffiusumi illulioriaatsikkut kultureqassutsimut naleqqussarniarnerat anguniagarineqarsimalluni, aammali akunnittarfimmut ilisarnaammik paasiuminarnerusumik pilersitsiniartoqarluni. Taamaalisukkut allannguiniarluni suliniut ilimaginngisamik toqqaviliiniarnikkut suliassamik isumagisassaqartitsisimavoq.

- Tassaasimavoq suliniut assupilussuaq pissanganartortalik. BJ Enterprise qanimut suleqatigaarput, suleqatigiinnermi tatiginniffigalugulu qanittuusoq suliniutip aqqusaagassani tamani isumannaatsumik ingerlataqarniossamut aalajangiilluinnarsimavoq, Jostein Burmann, E+N Arkitekterimi piginnittooqataasoq, illuliassanillu sanaartortartoq oqarpoq, taanna Sisimiuni betonngimik kuitsivimmik aamma ingerlataqartuusumik sumiiffiusumi suliffeqarfiutilimmmik BJ Enterprisemik peqateqarluni illup ilassutissaanik titartaallunilu inerikkiartortitaqarsimalluni.

Qaqqamut toqqaviliineq – qeriuaannartoq pinnagu

Illup ilassutaata ataani itinerpaaffik tassaavoq qaqqami meterinik 17-inik itissusilik, sumiiffinnili allani meterit arfineq-pingasuupput. Nassataraa illup nalinginnaasumut naleqqiullugu malunnaatilimmik itinerusumut toqqavilernissaa.

- Allaanngilaq sermiminermi assaaneq, tamannalu piviusumik sumiiffigisamik ilisimasaqarnissamik pisariaqartitsivoq. Siusinnerusukkut qeriuaannartumi sanaartortoqarsinnaavoq, silalli pissusiani allannguutit nassataraat ullumikkut qaarsortamut toqqaannartumik toqqaviliisarnissaq, Jostein Burmann oqarpoq.

Sanaartornerup nalaani itissuseq annertooq suli ataatsimik initaliinissamut periarfissiisoq paasineqarpoq – sioqqanik ujaqqanillu immersuiinnarnissaq pinnagu. Iluarsiissut taanna naqqumi pisortamut inissiamik, spa’qarfittullu immikkoortumik inissaliivoq.

- Illulioriaatsikkut unammillerfiusimasoq naleqassutsimik pilersitsinermut allanngortipparput, aammalu toqqavigisatut suliniutip naleqqussarneratigut akunnittarfimmut periarfissanik nutaanik pilersitsivugut.

Illup ilassutaa titartagartaqanngitsoq

Immikkut unammillerfigisassaq tassaasimavoq akunnittarfioreersumut, aallaqqaataani uulianut nappartanik toqqaviligaasumut attaviliineq.

- Illumut pisoqaanermut, uulianut nappartaniittunut qanoq ililluni illu nutaaq attaviligaassava? Tamanna ilinniartitsissutitut atuakkani takoriaannaanngilaq, Burmann oqarpoq, nangillunilu:

- Allannguuteqarniarluni suliniutini tamatigut pissutsit naatsorsuutiginngisat misigisarpagut, akuttunngitsukkulli Kalaallit Nunaanni unammillerfissat suli annertunerulaartarput, qaqutigorujussuarlu paasisaqarfigisassatut titartakkatigut atortussanik peqartarpoq. Illut pisoqaanerit amerlasuut atortussanik tigoriaannaasunik aallaaveqarluni sananeqartarput, aammalu pingaarnertut tunngavigititatut pinngortitami atugarisassanik peqartoqartarluni.

Illulioriaaseq sananeqarsinnaasuussaaq

Akunnittarfimmut suliniut siusissukkut neqeroortitsissutaavoq, Sisimiunilu iluarsiissutit teknikkip tungaatigut attassisinnaassusaannik, aammalu angallassanik aqutsinerit akunnaatsutullu suliarineqarsinnaaneri isumannaarniarlugit E+N Arkitekter BJ Entreprise peqatigalugu suliassamik piareersaasuuvoq.

- Kalaallit Nunaanni sanaartorneq issittumi silap pissusiani, silap qanoq innerata allanngorarnerani, aamma ukiup ilaani peqarnikkut imaaliallagassaaneq ajorpoq. Sulisorisat ilaatillugit suliffeqarfiutillup pitsaasumik sanaartorsinnaanissaanut suliniutip imatut sanaartugarisinnaanissaa qulakkeertariaqarpoq.

Illulioriaaseq, aamma issittumi pissutsinut atortussat

Akunnittarfik Sisimiuni oqaluffitoqqap saniani Frederiks Pladsimi inissisimavoq, illulu nutaaq nunatsinni qalipaatinik, aammalu sumiiffigisani illuliat suussusaannik aallaaveqarpoq, taamaattorli illulioriaatsikkut isikkoq allaanerussuteqartitaalluni.

- Illunik titartaasarfittut oqaluttuarisaaneq, aamma sumiiffimmi immikkuussuseq aallaavigisarpavut. Nassataraa annertuumik misissueqqissaarinermik suliaqarnissaq, aammalu illuliani allanngortinniarluni sumiiffigisami kultureqassutsimik paasisaqarniarneq. Siunnersuutitsinni akunnittarfik ilutsimut nutaamut toqqammavissatut inissiiniartuusimavoq, ilaatigullu illu sammivinnut nunatamut isikkivimmullu toqqaviliisunik aniingasunik piliaqarfigaarput, Burmann oqaluttuarpoq, nangillunilu:

- Aputilli sianigisassartaraa illup silataani qaffasissumeereerluni aattalernissaa, Danmarkimullu naleqqiullugu qaffasinnerujussuarnik assiaqusersuutinik sanaartugaqarpugut. Tassaavoq taama sakkortutigisutut silap pissuseqarfigisaani allatut timitaliineq. Illulioriaatsimi teknikkip tungaatigut silap pissusiani sakkortuumi, ingammik sakkortuutut anorersuartarnera, assullu aputip katersuuttarfigisaat oqimaatsut unammillerfigineqarlutik attassisinnaanermut ingerlatsinissamullu piumasaqaataasut alaatsinaatarineqarsimapput. Taamaattumik ussissumik silap pissusianut assiaqutit, aammalu immikkut aserujaassusilittut igalaat suussusaat pingaarutilittut najoqqutassaasimapput. Siunissamut isigissagaanni illu ukiorpassuarni tamaaniiginnartussanngorlugu sananeqarpoq.

2006-imit sanaartornermut malittarisassiaq malillugu Kalaallit Nunaat suli oqilisagaanerusutut nukissiornermut piumasaqaatit malillugit sanaartorfiugaluartoq akunnittarfiup allinerata ilaatigut silaannalersuutinut sakkortusisanik piumasaqaatitalimmi BR18-imi inissisimaffik malillugu suliarinissaa piareersagaavoq.

Ilusilersukkat ileqqorisatut ilisimaneqartutullu sananeqarnissaannut najoqqutassanik tunngaveqarput, taamaalillutik sumiiffiigisani piginnaasalinnit piviusunngortinneqarsinnaallutik. Silatini iluarsiissutit suliffeqarfiutilik peqatigalugu toqqarneqarput, taamaattumillu Sisimiuni sumiiffigisami betonngitut ilaasut kuisaapput, silatinilu ilaasut suliaqarfiusumi sanaartugaallutik. Betonngip qaavanut qisummik sinaakkusiaq ikkussugaavoq.

Iternganut sanaartorneq, aammalu 20 gradini ississusilimmut

Sulinermi pissutsit pilersaarusiornernut nakkutilliinernullu immikkut illuinnartunik piumasaqaatissiipput, tamaani aasaanerani nunap qaavani suliaqartoqassalluni, ukiuunerali annertunerusumik illup iluata pisatalersuutaanut atortussaliissutinullu ingerlatsiviussalluni.
Aammali 20 gradinik ississutsit tikillugit assaalluni suliaqarfinnik piffissaqartoqarpoq, Jostein Burmann oqaluttuarpoq:

-Issortami qerisumi suliaqarneq atortuutinik assut sakkortuumik nungusaasarpoq, atortullu aserorpata sillimmatit pisariaqarput, taamaattumillu pilersuutigisassat utaqqisariaqartarlutik. Tamanna aamma pilersaarusiornermi sianiginiarneqassaaq.

Pitsaassutsimik qularnaariniarluni silap pissusia sakkortooq annertunerusumik nakkutilliinernik, aammalu nakkutilliinermi uuttortaajuarnernik pisariaqartitsivoq – aammattaarlu iluarsiissutinik eqqortunik taakkuninnga sumiiffigisani suleqatigisat peqatigalugit qularnaariniartoqartassalluni.

Siunissami issittumi suliniutinut misilittakkat

E+N Arkitekter sumiiffimmi issittoqarfimmi suliniutinik arlalinnik suliaqarsimavoq, aammalu sanaartortitsisunik suliaqartuusunillu suleqateqarnikkut illuliassanik titartaasarfik misilittakkat taakku tunngavigalugit nangilluni sanaartugaqartuuvoq.

- Peqatigiilluni misissuisoqartariaqarpoq, aammalu sorlernik periarfissaqarnersoq paasineqassalluni, aammalu silap qanoq innerata aalajangiinera paasillugu. Taamaalisukkut nunatsinni sanaartornermut malittarisassiaq nutaaq takkutingajalerpoq, taassumalu uppernarsaanissamut piumasaqaatinik, aammalu aalajangersakkanik sakkortusisanik isumaliutigisassanik imaqarnissaa naatsorsuutigaarput.

Sisimiuni suliniut paatsuugassaanngitsumik suli annertunernik piumassuseqartitsilerpoq.

- Ilikkagarisaq aamma tassaavoq teknikkip tungaatigut atugassat katitikkat annertunertut naleqassutsimut allanngortinneqarsinnaanerat, tassalu iluarsiissutissat sumiiffigisami pissutsinik aallaaveqaraangata. Allannguiniarluni suliniutini aatsaat sanaartornermik ingerlatarisap nalaani titartarneqarsinnaasunik peqartoqartarpoq. Kalaallit Nunaanni tamanna suli ajornakusoornerulaartarpoq. Taamaattumik unammillerfissanik naapitsinerni qanimut oqaloqateqarneq aammalu iluarsiissutissanut aallutassaqarneq pingaartuupput. Peqatigiilluni iluatsitsisoqassaaq.

 

Kalaallit Nunaanni illuliorlunilu sanaartorfik pillugu allaaserisat amerlanerit atuakkit